с. Усть-Нем

Куим война пыр.

Куимнан степеня Слава ордена кавалеръяс пиысь квайт морт чужліс Коми АССР-ын. Куимӧн — Забоев, Соров, Худяков пӧгибнитісны. Бажуков, Чупров да Тимушев локтісны гортаныс сьӧкыда ранитчӧмӧн. Арлыд серти медыджыдӧн вӧлі Андрей Антонович Тимушев. Таво эськӧ сылы тырис 91 арӧс.

1897 вося август 12(25) лунӧ Анастасия Дмитриевна да Антон Николаевич Тимушевъяслӧн чужис пи. Пыртісны Усть-Немса Спасскӧй вичкоын да пуктiсны Андрей ним.

Зонка помаліс куим класса начальнöй школа да уджаліс батьыслӧн овмӧсын, вӧраліс. 1916 воын Андрей Тимушевӧс босьтісны царскöй армияӧ. Вӧлі пулемётчикӧн. Недыр мысти ранитчис, отравитчис газöн да веськаліс Киевса военнöй госпитальӧ. Тані и тӧдмаліс, мый Октябрьскöй революция путкыльтіс нартитысьясӧс, увтыртӧм йӧз босьтчисны лӧсьӧдны выль олӧм. 1918 во заводитчигӧн Тимушев локтіс Усть-Немӧ.

Сэки буретш пансис гражданскöй война. Воис и Коми муӧдз. Вӧвлӧм фронтӧвик гижсис Краснӧй армияӧ. Веськаліс Вашко-Мезенскӧй полкӧ. Взводса командирлы отсасьысь красноармеец Тимушев повтӧг дорйис Сöветскöй власть Войвылын. Но тшыгъялӧмысь да кынмалӧмысь сійӧ чорыда висьмис тифӧн. Висьӧмӧн и воис гортас. Сӧмын сэні ыджыдалісны белӧйяс, кодъяс мырдӧн мобилизуйтісны бурдтӧм на мортӧс колчаковскöй армияӧ. А 1919 во помын Тимушев бара Краснӧй армияын. Веськаліс Кавказскӧй фронт вылӧ. Пуктіс ассьыс пай контрреволюционнöй казачестволы паныд тышӧ.

1921 во помын ранитчӧм красноармеец бара воис гортас. Сэсся уджаліс вӧрын десятникӧн, лесоучастокса начальникöн.

Белӧй армияад веськавлӧмыд выльысь петкӧдчис 30-ӧд воясӧ. Сиктса юралысьяс эз вунӧдлыны казьтыштны лёк кывйöн Тимушевӧс, дойдны и семьясӧ. Да и сиктсаяс пиысь унаӧн видзӧдісны сы вылӧ лӧга. Да, олӧмыс гартыштчис нырагез моз. Вежӧртіс: аслад вуджӧрысь он пышйы. Йӧз вылӧ дӧзмыны да асьтӧ ошкыны нинӧмысь, ошкыны кö — йӧз ошкас.. И босьтчис медсьӧкыд да медколана уджас — трактористö. Уджаліс МТС-ын война пансьытӧдз.

Фронт вылӧ Андрей Тимушевӧс эз босьтны. Öткажитісны. Но мӧдӧдісны служитны вӧльнӧнаёмнӧй стрелокöн. Кымынысь сійӧ шыасьліс военкоматӧ, но век ӧткажитлісны. Он пӧ шогмы. И сӧмын 1943 вося сентябрь 30 лунӧ сійӧс корисны военкоматӧ да шуисны, медым лӧсьӧдчис фронт вылӧ. Веськаліс 134 стрелкöвöй дивизиялӧн 29 стрелкöвöй полкса лыжнöй батальонӧ. Салдатлӧн олӧмын тайӧ вӧлі коймӧд война. Кали­нинскöй, Прибалтийскöй, I-й Белорусскöй фронтъяс. Татшӧм вӧлі туйыс, кодi помасис Берлинын.

Вердин кар мездӧмысь дивизиялы сетісны «Вердинскӧй» ним, а Тимушевӧс да полкса ёртъяссӧ ошкис Верховнöй Главнокомандующӧй. Сэсся мездісны Смоленск, Витебск. Тані сійӧ первойысь ранитчис. 1944 вося июль 1 лунӧ дивизиялӧн 515 стрелкӧвӧй полкысь 3 стрелкöвöй ротаса красноармеец Тимушевӧс наградитісны «За отвагу» медальöн. Висла вуджигӧн А. Тимушев вӧлі нин коммунистӧн.

515 стрелкӧвӧй полкса командир гвардияса подполковник Пономарчук гижӧ:

«1944 вося июль 31 лунлы паныда войӧ сержант Тимушев аслас отделениекӧд ичӧтик пуръяс вылын вуджис Висла ю прӧтивниклӧн дугдывтӧг лыйсьӧм улын. Повтӧг зырӧдіс прӧтивникӧс берегысь да босьтіс неыджыд плацдарм. Фашистъяс казялісны, мый красноармеецъяслӧн выныс этша, сӧмын некымын морт. Недыр мысти плацдарм вылӧ уськӧдчисны автоматчикъяслӧн рота да кык самоходнӧй орудие. Тимушев ышӧдіс ёртъяссӧ да сетіс приказ: сулавны, кытчӧдз ловъяӧсь. Отделение орӧдіс нин некымын атака. Враг воштіс уна вын. Фашистъяслӧн ещӧ ӧти атака бӧрын Тимушев кыпӧдіс отделениесӧ да ачыс первойӧн уськӧдчис противник вылӧ. Первойӧн жӧ чеччыштіс траншеяӧ да бырӧдіс дас фашистӧс. Сьӧкыда ранитчис кокас, но помӧдз веськӧдліс бойӧн. Тимушев личнöй примерӧн да повтӧмлунӧн отсаліс юсӧ вуджны дивизиялӧн частьяслы.

А.А. Тимушев — Рӧдиналӧн патриот, мужественнöй воин, оз тӧд полöм бойын. Кора сетны сылы Сӧветскӧй Союзса Герой ним».

Кор тайӧ награднöй листыс муніс инстанцияяс пыр, Тимушев удитіс вӧчны мӧд подвиг. Вайӧдам гижӧдсӧ полкса командир подполковник Пономарчуклысь: «1944 вося август 22 лунӧ Тимушев первойӧн уськӧдчис атакаӧ да кыпӧдіс ас бӧрсяыс боецъясӧс. Враг куимысь уськӧдчылiс контратакаö, но Тимушев отделениеыскӧд тышкасис яра, ачыс бырӧдіс 15 фашистӧс да отсаліс. босьтны выль рубеж».

А сентябрь 15 лунся приказын вӧлі: сержант Тимушевӧс наградитны III степеня Слава орденӧн.

Андрей Антонович эз ло Сӧветскӧй Союзса Геройӧн. СССР-ысь Верховнöй Сӧветса Президиум нимсянь 69-ӧд армия кузя приказын пасйӧма, мый А.А. Тимушевӧс наградитӧма Краснӧй Знамя орденӧн. Тайӧ вӧлі 1944 вося октябрь 10 лунӧ.

Коли куим тӧлысь. Бжезустов да Наталии польскöй сиктъяс мездігӧн Тимушев петкӧдліс аддзывлытӧм героизм. Сійӧ пыр вӧлі сэні, кӧні медсьӧкыд. Сійӧ эз жалит асьсӧ, век шыбитчыліс первойӧн враглӧн окопъясӧ, тупкис аснас ёртъяссӧ. И томджык салдатъяс кыпӧдчылісны сы бӧрся. Польскöй сиктъяс мездӧмысь Андрей Антоновичӧс наградитісны II степеня Слава орденӧн.

Заводитчис Берлинскӧй операция. Торйӧн чорыд тыш пансис Одер рытыв берегын. 1945 вося апрель 19 лунӧ 62 номера высота вӧсна бойын пӧгибнитіс младшӧй лейтенант Тимченко. Противник шыбитчис став выннас. Лыйсис сідзи, мый весиг юртӧ лэптыны эз сет, непӧштӧ кыпӧдчыны паныд. Мый вӧчны? Сэки старшöй сержант Тимушев мӧвпыштіс вежны командирсӧ. Взводлы сетіс приказ: кывзыны сылысь, вӧчны сы моз жӧ. И бара первойӧн чепӧсйис контратакаӧ…

Татшӧм кос кывйӧн висьталӧ награднöй лист миян земляклӧн подвиг йылысь. А май 31 лунӧ СССР-ысь Верховнöй Сӧветса Президиумлӧн Указ пасйис, мый старшöй сержант А.А. Тимушев чорыд бойын петкӧдліс ыджыд героизм. Таысь сійӧс наградитӧма I степеня Слава орденӧн. Но геройӧс награда эз су. Водзджык Тимушев сьӧкыда ранитчис фаустпатронлӧн осколокъясысь. Сійӧс вайисны I-й Белорусскöй фронтлӧн госпитальӧ. Дыр куйліс садьтӧг. Веськыд пельпомсьыс дугдывтӧг петіс вир сора ор. Жугалӧма вӧлі и пидзӧсыс. Квайтӧд лунас вӧчисны операция пидзӧсас, ӧти кокыс лои дженьыдджык.

Госпитальын куйліс воысь унджык. Андрей Антонович вӧлисти сувтіс кок йылӧ. Сьӧкыд вӧлі восьлавны. Плеть моз ӧшаліс веськыд киыс. Татшӧмӧн и локтіс гортас. Ӧд кутшӧм олӧмыд вӧлі сэки сиктад. А тані ещӧ первой группаса инвалид… Но салдат семьясӧ эз сьӧктӧд. Сійӧ выльысь велӧдіс уджавны кисӧ и коксӧ.

А. АЛЕКСАНДРОВ

Югыд туй, 1988, Июнь 2 лун. 

 © Усть-Куломская межпоселенческая библиотека